Ríkið ekki skaðabótaskylt vegna sprengjuárásar

Íslenska ríkið er ekki skaðabótaskylt gagnvart Friðriki Má Jónssyni sem var flugumferðastjóri á herflugvellinum í Kabúl í Afganistan.

Hann lenti í sprengjuárásinni í Kjúklingastræti árið 2004 og skaddaðist á heyrn. Að auki var hann greindur með áfallastreituröskun og hefur ekki starfað eftir það.

Friðrik stefndi ríkinu á þeim forsendum að það hefði ekki verið staðið nægilega vel að vörnum og aðbúnaði í verslunarferðinni þar sem tilgangurinn var að kaupa teppi til minja um dvölina í Afganistan.

Friðrik hélt því fram að honum hafi ekki verið fullkunnugt um aðstæður þegar hann fór þangað, né hafi hann hlotið nægilega mikla þjálfun í meðferð skotvopna.

Héraðsdómur Reykjavíkur hafnar þessu og segir að hann hafi getað aukið við sig þjálfun í skotvopnum hefði hann viljað. Hann gerði það hinsvegar ekki.

Þá er það einnig talið ríkinu til framdráttar að Friðrik var búinn að vera í Afganistan í fimm mánuði áður en farið var í teppaferðina örlagaríku. Honum mátti vera kunnugt um ástandið í landinu.

Að lokum segir í dómi að Friðrik hafi farið á eigin vegum, hann hafi ekki farið þessa ferð vinnunar vegna.

Var ríkið þar af leiðandi ekki talið skaðabótaskylt vegna málsins.