Lögreglan leitar vitna að kynferðisbroti

Lögreglan á höfuðborgarsvæðinu rannsakar nú meint kynferðisbrot gagnvart konu að morgni laugardagsins 2. maí síðastliðinn. Talið er að brotið hafi verið framið á tímabilinu frá klukkan korter í fimm til korter yfir fimm. Meint brot er talið hafa átt sér stað í fólksbifreið í bifreiðastæði við Tollhúsið í Tryggvagötu í Reykjavík.

Í tilkynningu frá lögreglunni segir að konan hafi greint frá því að hún hefði hlaupið yfir götuna í átt að skemmtistaðnum Amsterdam eftir brotið og þá hefði verið öskrað ókvæðisorðum á eftir henni á erlendu tungumáli. Hún taldi að vitni hefðu séð þetta. Eftir meint brot fór konan á Ingólfstorg þar sem tveir vegfarendur, maður og kona, gáfu sig að henni.

Lögreglan biður þá sem urðu vitni að framangreindum atburði eða búa yfir upplýsingum sem geta varpað ljósi á málið að hafa samband við kynferðisbrotadeild lögreglunnar á höfuðborgarsvæðinu í síma 444-1000.