Gott að hafa Gylfa og Rögnu

„Mér líst vel á að hafa þau Gylfa og Rögnu áfram," segir Birgitta Jónsdóttir, þingflokksformaður Borgarahreyfingarinnar. Meiri friður geti verið um ópólitíska ráðherra.

Birgitta segist einnig tiltölulega ánægð með að tillaga um aðildarviðræður að Evrópusambandinu verði útkljáð á Alþingi.

„Ég held að það sé skásta lausnin eins og staðan er í dag," segir hún.

Þjóðin þoli ekki meiri skotgrafahernað um stór mál sem þetta. „Og við viljum að stofnun verði sett á laggirnar, sem miðli ópólitískum upplýsingum um ESB-aðild til almennings." - kóþ