Posh líkt við geðstirt nagdýr

Victoriu Beckham er ekki tekið jafn vel vestan hafs og hún átti von á. Heimildarmynd um flutning hennar til Bandaríkjanna var sýnd á NBC sjónvarpsstöðinni á mánudag, við takmarkaða hrifningu gagnrýnenda.

Upphaflega stóð til að gera sex þætti um flutninga Beckham hjónanna til Los Angeles þar sem David hefur skrifað undir 250 milljón dollara samning til fimm ára við Los Angeles Galaxy fótboltaliðið. Efnið þótti svo ekki nógu spennandi og því ákvað sjónvarpsstöðin að gera einn klukkutíma langan þátt úr því.

Posh Spice hafði vonað að þátturinn myndi kynna húmor hennar og persónuleika fyrir þjóð sem þekkti hana einungis af myndum. Hún sagðist bara vera venjuleg stelpa frá London. Gagnrýnandi New York Times sagði hinsvegar að hún væri allavega venjuleg í Los Angeles, þar sem hún væri einungis enn ein ríka og ljóshærða sprautubrúna eiginkonan.

Tæpar fimm milljónir manna fyldust með þættinum, þar sem Snobbkryddið liggur í sólbaði, verslar, tekur bílpróf og lærir að hegða sér í jarðskjálfta. ,,Beckham, sem á einhvern furðulegan hátt er sífellt að stilla sér upp, veitir okkur innsýn inn í hversu meiriháttar eitthvað veski er, eða hvernig nýi síminn breytti lífi hennar," sagði Linda Stasi gagnrýnandi New York Post og líkti þættinum við orgíu af sjálfsdýrkun.

Annar sagði stjörnuna helst líkast geðstirðu nagdýri á svipinn.

Stjarnan hafði ekki miklar áhyggjur. ,,Ef fólk er ánægt með þáttinn þá er það fínt, ef ekki missi ég svo sannarlega ekki svefn yfir því" sagði dívan við Reuters fréttastofuna.