Komnir heim

Íslensku friðargæsluliðarnir sem særðust í sprengjárás í Kabúl um síðustu helgi komu heim í dag. Þeir tjá sig ekki um gagnrýni á yfirmann þeirra. Vinir og ættingjar þeirra Hauks Grönlí, Steinars Arnars og Stefáns fögnuðu þeim innilega við komuna. Konur þeirra hittu þá í Noregi en utanríkisráðuneytið kostaði för þeirra út. Þeir svöruðu spurningum fréttamanna en vildu lítið tjá sig um atburðinn sjálfan. Vísa til skýrslu sem væntanleg sé frá utanríkisráðuneytinu. Stefán segir að þeir séu ekki að gagnrýna yfirmann sinn með því að ganga um í bolum með áletrun sem vísar með svörtum húmor til atburðarins. Aðeins sé um að ræða leið til þess að komast yfir áfallið. Fram hefur komið að íslensku friðargæsluliðarnir voru í erindagjörðum yfirmanns þeirra þegar árásin var gerð. Halldór Ásgrímsson, forsætisráðherra segir að farið verði yfir þau mál og verið sé að gera það nú.