Kennslan hefst á mánudag

Kennsla hefst í grunnskólum landsins á mánudag, eftir að deilendur í kennaradeilunni samþykktu í nótt að fresta verkfallinu á meðan báðar fylkingar kynntu sér nýja miðlunartillögu ríkissáttasemjara og greiddu atkvæði um hana. Ásmundur Stefánsson ríkissáttasemjari kynnti samningamönnum tillöguna upp úr miðnætti, en í þessu ferli taka samninganefndirnar sjálfar ekki afstöðu til tillögurnar, heldur geta þær gert athugasemdir. Þær fengu tillöguna svo fullbúna í hendur laust fyrir klukkan tíu í morgun. Síðan munu starfsmenn Ríkissáttasemjara útbúa gögn handa öllum kennurum og sveitarstjórnarmönnum, sem málið varðar og á það að vera klárt um hádegi á sunnudag. Samið hefur verið við póstinn um að sækja gögnin um hádegi á sunnudag og undirbúa dreifingu strax á mánudagsmorgun. Kosningu kennara og sveitarstjórnarmanna um tillölguna á svo að ljúka fyrir næstu helgi og verða atkvæði talin á mánudag, eftir rúma viku. Ásmundur segir það mjög mikilvægt að samið hafi verið um frestun á verkfallinu. Menn geti þá fjallað um efnið við sínar venjulegu vinnuaðstæður, sem sé mjög gott. Verði tillagan svo samþykkt hafi hún gildi kjarasamnings. Ásmundur vill ekki greina frá innihaldi tillögunnar að svo stöddu, en hún fór að mótast síðdegis í gær, eftir að formenn samninganefnda réðu ráðum sínum við félagsmenn í kjölfar fundar með ríkissáttasemjara í gærmorgun. Eftir því sem Fréttastofan kemst næst er í tilllögunni gert ráð fyrir langtímasamningi, eða til allt að fjögurra ára. Þá eru í einhverjum tilvikum meiri hækkanir en í hugmyndunum sem sáttasemjari kynnti samninganefndum fyrir rúmri viku. Kennarar eiga að mæta til vinnu í dag til að undirbúa skólahald á mánudagsmorgun. Samkvæmt skólaalmanaki á vikulangt vetrarfrí að hefjast í mörgum grunnskólum á mánudag og eru það frídagar kennarra. Sveitarfélögin verða því að semja við kennara um greiðslu launa fyrir að vinna í fríinu, þar sem svo stendur á, ef kennsla á að geta hafist á mánudagsmorgun. Vetrarfí kennara á til dæmis að vera í Reykjavík í næstu viku og ætlar Fræðsluráð Reykjavíkur að fjalla um málið á aukafundi í dag. Kennarar í Garðabæ og Kópavogi eru hinsvegar búnir að taka sín vetrarfrí, ef svo má að orði komast. Fræðsluráð Hafnarfjarðar hefur verið boðað til aukafundar þar sem lögð verður fram tillaga til afgreiðslu um að fella þar vetrarfríið niður, og á kennsla að hefjast þar á mánudag.