Verðmatið á Gagnaveitunni verði opinbert

Fulltrúar Samfylkingarinnar í borgarráði hafa óskað eftir því að mál Gagnaveitu Reykjavíkur verði sett á dagskrá borgarráðs á morgun, 27. september 2007. Jafnframt hefur verið óskað eftir því að lagt verði fram verðmat Glitnis og Landsbanka Íslands á Gagnaveitunni og að það verði þar með gert opinbert. "Ótækt er að leyndinni sé viðhaldið vegna þröngra flokkshagmuna Sjálfstæðisflokksins," segir í frétt um málið.

Stjórn Orkuveitu Reykjavíkur fékk Glitni og Landsbankann sl. vor til að leggja mat á verðmæti Gagnaveitu Reykjavíkur. Þetta var gert að frumkvæði Guðlaugs Þórs Þórðarsonar þáverandi stjórnarformanns OR og helsta gagnrýnanda Gagnaveitunnar.

"Hafi þetta verið leiðangur til að sanna að áralöng gagnrýni hans hafi átt við rök að styðjast mistókst það herfilega. Fjölmiðlar hafa greint frá því að niðurstöðurnar um verðmæti fyrirtækisins sé um 10 milljarðar króna og verði allt að 30 milljarðar á næstu árum," segir í fréttinni. "Með öðrum orðum mun Gagnaveitan á örfáum árum verða jafnverðmæt og söluandvirðið sem borgarstjóri sættist á fyrir 46% hlut borgarinnar í Landsvirkjun."