Dapurt á gulldepluveiðum

„Það má sennilega best orða þetta með því að segja að það er ákaflega rólegt yfir þessum veiðum. Við drögum trollið allan daginn og megum þakka fyrir að ná 100 tonna afla. Í gær fengum við reyndar ekki nema 60 tonn og það er ekki viðunandi árangur,“ sagði Arnþór Hjörleifsson, skipstjóri á Lundey NS, í viðtali á heimasíðu HB Granda.

Lundey fór til veiða á gulldeplu í byrjun vikunnar eftir að skip HB Granda höfðu legið í höfn í nokkra daga vegna brælu á miðunum. Að sögn Arnþórs var Lundey komin á miðin að morgni þriðjudags. „Þetta eru pínulitlir blettir sem við erum að eltast við og það skiptir sköpum að hitta á þá,“ segir Arnþór.

Lundey hefur verið að veiðum suður af Skerjadjúpinu en gulldepluveiðarnar hafa lengst af verið stundaðar í Grindavíkurdjúpi. Nú styttist í að skip HB Granda fari til loðnuveiða en rætt hefur verið um að Faxi RE fari til veiða um næstu helgi. Arnþór Hjörleifsson á Lundey neitar því ekki að það verði skemmtileg tilbreyting að fara á loðnuveiðar.

„Maður hefur eiginlega varast að hugsa of mikið um loðnuna en maður kemst ekki hjá því að heyra hvar þau fáu skip, sem nú eru á loðnuveiðum, eru stödd. Loðnugangan virðist vera komin vestur að Grindavík og það verður að teljast til tíðinda,“ sagði Arnþór. - shá