Vilja fá að skjóta ref á Ströndum

Skotveiðifélag Íslands ætlar að beita sér fyrir því með heimamönnum, að friðun á ref á Ströndum verði aflétt. Hún sé vanhugsuð náttúruvernd.

Sigmar B. Hauksson, formaður Skotvís, vísar til rannsókna í Bandaríkjunum, Svíþjóð, Kanada og víðar þar sem stofnar rándýra í þjóðgörðum hafa verið friðaðir. Reynslan sé alls staðar sú sama, ofvöxtur hlaupi í stofnana og dýrin fari að leita út fyrir friðunarsvæðin.

Það sé að gerast hér á landi auk þess sem refurinn sé að ganga af fuglalífi dauðu í friðlandinu sjálfu. Bendir hann meðal annars á tjón vegna fækkandi æðarfugls en æðarrækt hafi lengi verið þýðingarmikill búgrein á Vestfjörðum. Refaplágan hafi vafalítið líka áhrif á rjúpnastofninn.

Sigmar segir að 15. janúar síðastliðinn hafi Skotvís ritað umhverfisráðherra bréf og hvatt hann til að heimila refaveiðar í friðlandinu á Hornströndum en ekki hafi enn borist svar. Og Sigmar spyr hverjir hafi beðið um þessa friðun, alla vega ekki þeir sem búa næst friðlandinu.