Telur erlendum arkitektum hyglað í forvali Landspítala

Hilmar Þór Björnsson, arkitekt og stjórnarmaður í Arkitektafélagi Íslands, segir að kröfur í forvali í arkitektasamkeppni fyrir nýtt háskólasjúkrahús við Hringbraut útiloki íslenska arkitekta. Hann telur kröfurnar benda til að meðvituð ákvörðun hafi verið tekin um að beina verkefninu út fyrir landsteinana. Formaður forvalsnefndar segir þetta alfarið rangt.

Forvalið snýr að hönnunarsamkeppni um skipulag lóðar Landspítala og Háskóla Íslands við Hringbraut og frumhönnunar nýbyggingar Landspítalans. Þar er leitað að teymum sem þurfa að hafa samtals að lágmarki hundrað háskólamenntaða sérfræðinga á sviði mannvirkjagerðar í vinnu og ábyrgðaraðili skal hafa að lágmarki þrjátíu starfsmenn sem uppfylla sömu kröfur.

Hilmar Þór, sem bloggaði um málið á Eyjunni í gær, segir að til þess að meta reynslu teymanna í hönnun sjúkrahúsbygginga sé gerð krafa um að umsækjandi hafi teiknað minnst 100 rúma sjúkrahús til að fá stig í forvalinu og til að fá fullt hús stiga þarf teymið að hafa hannað minnst þrjá 500 sjúkrarúma spítala á síðustu tíu árum. Engar íslenskar stofur hafi hannað svo stórt sjúkrahús og því sé ekki hægt að skilja þessa kröfu í forvalsgögnum öðruvísi en að verkefnastjórnin óski eftir að leitað verði út fyrir landsteinana með arkitektaþjónustu.

Ingólfur Þórisson, formaður forvalsnefndar, segir það einfaldlega rangt að reynt hafi verið að útiloka Íslendinga. Þvert á móti sýni krafa um talað og ritað íslenskt mál í forvalinu að sérstaklega sé óskað eftir kröftum íslenskra arkitekta. „Það er verið að leita að breiðum hópi hönnuða til að koma að þessu verki.“ Hann segir að menn verði að gera sér grein fyrir umfangi og flækjustigi verkefnisins og nauðsynlegt sé að umsækjendur hafi aðgang að sérfræðingum sem tekið hafa að sér hönnun með viðlíka umfang og nýtt háskólasjúkrahús. Það gæti þýtt að íslensk stofa myndi styðjast við þekkingu og reynslu erlendra sérfræðinga.

Áður hafði Arkitektafélag Íslands bent á að vegna mannfæðar gæti engin íslensk stofa verið ábyrgðaraðili. Fór félagið fram á að verkefnið yrði brotið upp í minni verkhluta og haldnar sérstakar samkeppnir um hvern þeirra. Þessu var hafnað af verkefnisstjórninni.

Frestur til að skila forvalsgögnum rennur út á mánudag.svavar@frettabladid.is