Ekki ekið á manninn í Hraunbergi

Rannsókn lögreglunnar á höfuðborgarsvæðinu í svokölluðu Hraunbergsmáli hefur leitt í ljós að ekki var ekið á manninn í umræddu máli.

Málavextir voru á þá leið að lögreglan var kölluð að Hraunbergi í Breiðholti föstudagskvöldið 4. ágúst sl. Þar lá karl á sjötugsaldri illa á sig kominn en grunur lék á að ekið hefði verið á hann.

Grunur beindist strax að ákveðnum bíl og var ökumaðurinn yfirheyrður.

Við rannsókn málsins kom ekkert það fram sem bendir til að hann hafi átt hlut að máli. Sama á við um farþega sem voru í bílnum en umrætt ökutæki var rannsakað ítarlega. Það er jafnframt álit sérfróðra aðila að áverkar á hinum slasaða séu ekki tilkomnir vegna umferðarslyss.

Í samtali við Vísi sagði Margeir Sveinsson hjá umferðardeild lögreglunnar að talið sé að maðurinn hafi fallið í götuna og þannig hlotið alvarlega áverka, þar á meðal höfuðkúpubrot. Hvort honum hafi verið ýtt er ekki vitað að sögn Margeirs.