Þúsund íbúar mótmæla sjúkrabílaleysi

Rúmlega eitt þúsund undirskriftir íbúa Fjallabyggðar hafa safnast gegn áformum Heilbrigðisstofnunar Norðurlands (HSN) um að leggja af sjúkrabíl í Ólafsfirði. Telja íbúar mikilvægt að sjúkrabíll sé áfram í byggðarlaginu.

HSN hefur tekið ákvörðun um að aðeins verði sjúkrabílar á Dalvík og Siglufirði til taks á norðanverðum Tröllaskaga. Íbúar eru gríðarlega ósáttir og telja öryggi sínu ógnað.

Jón Valgeir Baldursson, bæjarfulltrúi í Fjallabyggð og fyrrverandi sjúkraflutningamaður, telur þetta mikla afturför. „Að missa sjúkrabíl af svæðinu er afturför áratugi aftur í tímann. Viðbragðstíminn eykst allavega um 20 til 25 mínútur við bestu aðstæður,“ segir Jón Valgeir. 

„Sjúkrabíllinn í Ólafsfirði er staddur miðsvæðis þeirra þriggja sem eru á Tröllaskaganum og er því alltaf með stystan viðbragðstíma ef kalla þarf út aukabíl til Siglufjarðar eða Dalvíkur.“

Í fyrra fór sjúkrabíllinn í 107 aðgerðir á meðan sjúkrabíllinn á Siglufirði fór í 181 útkall og 125 útköll á Dalvík. Það sem af er árinu 2017 hefur sjúkrabíllinn á Ólafsfirði farið í 29 útköll.

„Ég skora á forstjóra HSN að koma í Ólafsfjörð og halda opinn fund fyrir íbúa og leggja fram rökstuðning HSN fyrir þessari aðgerð áður en þau leggja niður starfsemi sjúkrabílsins í Ólafsfirði,“ bætir Jón Valgeir við.

Jón Helgi Björnsson, forstjóri HSN, segir mótmæli íbúa ekki munu breyta ákvörðuninni. „Þetta er gert að vel ígrunduðu máli. Við munum auðvitað skoða það sem komið hefur fram en ég tel á þessari stundu ekkert breyta þeirri ákvörðun sem tekin hefur verið,“ segir Jón Helgi. 

„Nú eru gerðar ríkari kröfur til sjúkraflutningamanna um fjölda útkalla til að þeir haldi sér í þjálfun. Fjöldi útkalla í Ólafsfirði er hreinlega of lítill til að hægt sé að halda úti mannaðri vakt á sjúkrabíl þar.“