Íslenskur karlmaður borinn þungum sökum í nafnlausu bréfi

Lögreglan hefur til rannsóknar nafnlausar bréfasendingar þar sem karlmaður er borinn þungum sökum um kynferðisbrot. Maðurinn hefur kært málið. „Við erum með til skoðunar kæru manns sem telur að sér veist með þessum hætti,“ segir Grímur Grímsson, yfirmaður miðlægrar deildar lögreglunnar á höfuðborgarsvæðinu.

Umrætt bréf hefur undanfarið borist inn á lögmannsstofur, fjármálastofnanir og til fjölmiðla. Um er að ræða útprentað blað með mynd af manninum þar sem hann er sagður hafa, á ótilgreindum tíma kvöld eitt, brotið gegn konu sem fór með honum heim eftir skemmtun.

Þá kemur fram að bréfsendandi viti að fólki kunni að finnast slíkar nafnlausar ásakanir siðlausar en um slíkt skeyti hann engu. Tilgangurinn sé að vara konur við manninum.

Sending bréfsins getur varðað við 236. grein almennra hegningarlaga sem segir að sé ærumeiðandi aðdróttun birt eða borin út opinberlega varði það sektum eða fangelsi allt að 2 árum.

Jón Þór Ólason, sérfræðingur í refsirétti, segir að alla jafna séu ærumeiðingamál einkarefsimál sem þýði að viðkomandi beri að stefna geranda í málinu án aðkomu ákæruvalds. Því sé öðruvísi farið í þessu máli. Samkvæmt 242. almennra hegningarlaga breytir öllu að um sé að ræða nafnlaust, skriflegt bréf. Nafnleysið geri málið að opinberu refsimáli þar sem hinu opinbera ber að rannsaka mál og gefa út ákæru ef þykir líklegt til sakfellingar. Engin fordæmi eru fyrir því að dæma til fangelsisvistar fyrir ærumeiðandi aðdróttanir.

Í opinberum sakamálum tíðkast að brotaþolar njóti nafnleysis og hægt er að fara fram á lokað þinghald.