David Coote fær ekki að dæma leik í ensku úrvalsdeildinni um næstu helgi vegna mistakanna sem hann gerði í leik Everton og Liverpool á laugardaginn. Hann var myndbandsdómari í Bítlaborgarslagnum á Goodison Park.
Jordan Pickford, markvörður Everton, slapp við refsingu þegar hann tæklaði Virgil van Dijk eftir að rangstaða var dæmd á Liverpool snemma leiks. Coote gleymdi því að hann mætti skoða atvikið þótt rangstaða hafi verið dæmd.
Van Dijk sleit krossband í hné, þarf að fara í aðgerð og leikur væntanlega ekki meira með Liverpool á þessu tímabili.
Coote dæmdi leik Leeds United og Wolves í gær en fær ekki að dæma um næstu helgi. Hann verður að gera sér að góðu að vera fjórði dómari á leik West Ham og Manchester City.
Coote var dómari og/eða myndbandsdómari í fyrstu fimm umferðum ensku úrvalsdeildarinnar en situr hjá í 6. umferðinni.
