Hér telur jarðeðlisfræðingurinn líklegast að gossprungan opnist
Stöðug smáskjálfavirkni í dag staðfestir að ekkert lát er á landrisi í Eldvörpum og Svartsengi. Komi til eldgoss þykir líklegast að það verði á sprungu norðvestan Þorbjarnar og í því tilviki segir Páll Einarsson jarðeðlisfræðingur að fjallið myndi virka eins og varnargarður fyrir Grindvíkinga. Þetta kom fram í fréttum Stöðvar 2.
Landrisið á svæðinu norðan Grindavíkur mælist nú yfir þrír sentímetrar og jarðskjálftamælir þar hefur sýnt stöðuga smáskjálfta í dag.
„Þetta segir þá sögu að landrisið er í gangi núna, - bara nákvæmlega þessa síðustu klukkutíma,“ sagði Páll í dag.
Páll telur alls ekki víst að þessi rishrina endi með gosi en ef svo fari, þá sé líklegast að sprungan opnist norðvestan Grindavíkur. Á korti sýnir hann hvernig hann telur langlíklegast að gossprungan myndi liggja í stefnu suðvestur-norðaustur út frá safnsvæði kvikunnar norðvestan Þorbjarnar.
„Við getum sagt að langlíklegast sé þetta svæði hér,“ segir Páll um leið og hann leggur kennaraprikið yfir sprungulínuna um Eldvörp á kortinu.
„En þetta er nokkuð langt. Það nær hér suður að ströndinni og það nær alveg hingað norður undir Keflavíkurveg,“ segir hann.
Í þessu tilviki gæti fjallið Þorbjörn reynst bjargvættur byggðarinnar.
„Þorbjörn er ekki að ógna byggðinni í Grindavík. Þvert á móti. Hann virkar eins og varnargarður fyrir Grindvíkinga. Þannig að ef það gýs fyrir norðan eða vestan við Þorbjörn, þá mun hann beina hrauninu annað en niður í byggðina.“
Versta staðan fyrir Grindavík væri ef svokölluð Sundhnúkasprunga austan Þorbjarnar myndi gjósa.
„Ef við horfum á söguna þá er náttúrlega þessi sprunga hér, Sundhnúkasprungan, hún er náttúrlega hættulegust. Hún er beinlínis hér innan bæjarmarkanna í Grindavík. Hún gaus fyrir um það bil tvöþúsund árum síðan.“
Landrisið sé hins vegar utan við þessa sprungu.
„Og þá er Sundhnúkasprungan kannski stikkfrí í bili,“ segir Páll.
Þegar spurt er hvaða mannvirki væru helst í hættu bendir Páll á að þau gætu skemmst vegna sprunguhreyfinga jafnvel þótt ekki gjósi. Hann byrjar á því að benda á suðurströndina vestan Staðarhverfis.
„Þá er vegurinn og fiskiræktarfyrirtækin kannski í hættu fyrir tjóni. Ef það fer í norðurátt þá er það náttúrlega Svartsengi og Bláa lónið sem eru þar í skotstefnunni. Og Grindavíkurvegurinn. Og það er hitaveituleiðslan til Keflavíkur, sem eru þá undir.“
Hann telur að þarna verði fremur rólegt gos.
„Ef fólk fer varlega og ef það tekst að gefa út viðvörun nægilega snemma, þá er enginn í neinni hættu,“ segir Páll Einarsson jarðeðlisfræðingur.
Hér má sjá frétt Stöðvar 2:
Tengdar fréttir
Alvarlegast ef hitaveitan bregst segir bæjarstjórinn í Grindavík
Hann hefur vakið athygli þingnefndar á því að hugsanlega þurfi að auka fjárveitingar til ýmissa stofnanna ef þær þurfa að bregðast við.
Fimm þúsund manns á hættusvæði ef gossprunga opnast við Svartsengi
Hratt landris í Svartsengiseldstöðinni, milli Grindavíkur og Bláa lónsins, hefur haldið áfram í dag. Fimm þúsund manns gætu verið innan hættusvæðis, fari svo að eldgos brjótist út.
Búa sig undir hraungos í Svartsengi á margra kílómetra langri gossprungu
Almannavarnir búa sig undir að hraungos geti opnast á sprungu í Svartsengiseldstöðinni milli Grindavíkur og Bláa lónsins. Hratt landris mælist á svæðinu en jarðeðlisfræðingur segir þó algengast að svona atburður endi með kvikuinnskoti.
Mæling gervitungls skýrir áhyggjur manna af Grindavík og Bláa lóninu
Orkuverið í Svartsengi og Bláa lónið eru inni á rauða blettinum og byggðin í Grindavík í jaðrinum á mynd sem unnin er úr gögnum frá gervitungli.
Gul eldgosaviðvörun á flug aðeins tólf kílómetra frá Keflavíkurflugvelli
Litakóði alþjóðaflugs fyrir eldfjöll á Reykjanesskaga hefur verið færður yfir á gult. Svæðið er aðeins í tólf kílómetra loftlínu frá flugbrautum Keflavíkurflugvallar, stærsta og mikilvægasta alþjóðaflugvallar landsins.
