Innlent

Fimm þúsund manns á hættusvæði ef gossprunga opnast við Svartsengi

Kristján Már Unnarsson skrifar
Líklegast er talið að gossprunga opnist norðvestan við Svartsengi, að því er fram kom á íbúafundinum í Grindavík síðdegis. Nokkrar flóttaleiðir eru mögulegar frá Grindavík.
Líklegast er talið að gossprunga opnist norðvestan við Svartsengi, að því er fram kom á íbúafundinum í Grindavík síðdegis. Nokkrar flóttaleiðir eru mögulegar frá Grindavík. HÍ, ÍSOR, Stöð 2/Vincent Drouin, Hafsteinn Þórðarson.

Hratt landris í Svartsengiseldstöðinni, milli Grindavíkur og Bláa lónsins, hefur haldið áfram í dag. Fimm þúsund manns gætu verið innan hættusvæðis, fari svo að eldgos brjótist út. Í fréttum Stöðvar 2 var útskýrt með myndrænum hætti hversvegna þessi atburður veldur verulegum áhyggjum. 

Mynd frá Veðurstofunni sýnir hvar kvikan er að þrýsta á og valda hröðu landrisi. Rauður blettur táknar svæðið þar sem land hefur risið mest síðustu vikuna, samkvæmt mælingum gervitungls. 

Mestu áhyggjurnar snúa að Grindavík, þar sem búa um 3.500 manns; Bláa lóninu, þar sem kannski 1.500 manns gætu verið hverju sinni, bæði ferðamenn og starfsmenn, og svo einnig orkuverinu í Svartsengi, sem sér Suðurnesjamönnum fyrir bæði rafmagni og heitu vatni.

Þekktar sprungur á svæðinu liggja í stefnuna suðvestur-norðaustur. HÍ, ÍSOR, Stöð 2/Vincent Droin, Hafsteinn Þórðarson.

Ef gos kæmi upp telja vísindamenn að það yrði hraungos á sprungu í stefnu suðvestur-norðaustur sem gæti orðið nokkurra kílómetra löng, og sú gossprunga gæti lokað Grindavíkurvegi. 

Sem betur fer Grindvíkinga, þá eru fleiri flóttaleiðir, bæði austur Suðurstrandarveginn en einnig til vesturs í átt að Reykjanesvita, og ef allt um þrýtur hafa þeir einnig höfnina og fjölda báta, rétt eins og íbúar Vestmannaeyja höfðu árið 1973. 

Landrisið nær yfir stærra svæði en bara rauða blettinn. Svört lína á myndinni táknar hvar þverskurðarmynd er dregin upp af landrisinu og á henni sést að það nær yfir tíu til tólf kílómetra breitt belti, allt vestur frá Eldvörpum og langleiðina austur að Ísólfsskála. 

En það er líka búið að gefa út gula eldgosaviðvörun gagnvart alþjóðaflugi en loftlínan frá líklegu gossvæði til flugbrauta Keflavíkurflugvallar er bara tólf kílómetrar. Komi til goss miða áætlanir við að flugvellinum verði lokað strax, hugsanlega bara í nokkrar klukkustundir eða fáeina sólarhringa en það réðist af öskufalli og gosmekki. 

Hér má sjá frétt Stöðvar 2:


Tengdar fréttir

Bæjarstjórinn lýsir ótta og kvíða í Grindavík

Bæjarstjóri Grindavíkur segir bæði ótta og kvíða hjá íbúum vegna óvenjulegs landriss vestan við fjallið Þorbjörn í nágrenni bæjarins. Lögreglustjórinn á Suðurnesjum segir mikilvægt að fullorðnir sem börn og unglingar fylgist vel með framvindu mála. Bakarameistarinn í bænum segir fólk skelkað en ánægt með viðbragðsaðila.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.