Innlent

Umferð um Hringveginn jókst milli mánaða

Andri Eysteinsson skrifar
Íslendingar tóku við sér í akstri í mánuðinum.
Íslendingar tóku við sér í akstri í mánuðinum. Vísir/Vilhelm

Umferð um Hringveginn jókst um 13% milli júní og júlí en þrátt fyrir þá aukningu var umferðin 3,4% minni en á sama tíma í fyrra. Þetta kemur fram í gögnum sem birt voru á vef Vegagerðarinnar í dag.

Þar kemur fram að umferð hafi dregist saman á öllum landsvæðum milli ára en mestur samdráttur var á Austurlandi eða 8,3%. Umferð dróst minnst saman í kringum höfuðborgarsvæðið eða 0,9%. Þá segir að umferðin hafi verið á pari við sama tíma árið 2017.

Umferð hefur dregist saman um 12,1% frá áramótum miðað við sama tímabil árið 2019. Um er að ræða lang mesta samdrátt í umferð sem sést hefur.

Mesti samdráttur í júlí var um Mývatnsheiði eða 26,3% og var það einungis á einum mælistað þar sem umferð dróst ekki saman miðað við júlí 2019 og var það um Hellisheiði. Umferð um heiðina jókst þó ekki mikið, eingöngu 0,4%.

Talið er að umferðaraukningu milli júní og júlí megi skýra með auknum sumarfrís-akstri landsmanna í bland við aukinn fjölda ferðamanna hér á landi.

Búist er við því að umferð aukist ekki í neinum mánuði það sem eftir er ársins samanborið við 2019. Umferð gæti því dregist saman um 10%. Gangi það eftir yrði það lang mesti samdráttur sem mælst hefur, tvöfalt meiri en áður hefur mælst.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×