Landsbjörg varar ferðalanga við

Slysavarnafélagið Landsbjörg varar fólk eindregið við því að halda á fjöll á norðanverðum Vestfjörðum og á Norðurlandi nú þegar snjóflóðahætta er víða á svæðinu. Í tilkynningu segir að snjóflóð gætu einnig fallið víðar, sérstaklega þar sem fólk er á ferðinni, t.d. á vélsleðum og því ætti enginn að vera á ferð í fjalllendi nema kunna að meta snjóflóðahættu og vera með snjóflóðaýli, stöng og skóflu.

Veðurstofan hefur varað við stórhríð á Vestfjörðum í kvöld og í nótt og svo hvessir á Vesturlandi og verður allhvöss norðanátt í kvöld og í nótt. Á höfuðborgarsvæðinu verður einhver ofankoma og töluverður skafrenningur en mikið er af lausasnjó og má því búast við mikilli ófærð.

„Fólk er því beðið um að vera ekki á ferðinni nema á vel búnum bílum en gera ella ráðstafanir til að komast leiðar sinnar á annan hátt, t.d. með því að nýta sér almenningssamgöngur þar sem þær eru til staðar," segir í tilkynningu Landsbjargar.

„Slysavarnafélagið Landsbjörg vill benda ferðalöngum á að undirbúa sitt ferðalag vel. Aldrei á að leggja af stað nema kanna færð á vegum og veðurspá auk þess að skoða heimasíðuna Safetravel.is. Þar má finna fréttir af ferðaaðstæðum um allt land, búnaðarlista, heilræði og síðast en ekki síst, skilja eftir ferðaáætlun."