Borgarbúar hafa nægar byrðar að bera

Auknar álögur á borgarbúa eru ekki góð leið til að bregðast við þeim aðstæðum sem nú ríkja í efnahagslífinu, segir Hanna Birna Kristjánsdóttir borgarstjóri. Samkvæmt fjárlagafrumvarpi borgarstjórnar fyrir næsta ár er gert ráð fyrir að útsvar og fasteignagjöld verði ekki hækkuð.

„Við teljum að þegar við gáfum út aðgerðaráætlun í október þar sem við hétum því að við myndum ekki varpa þessum efnahagsþrengingum yfir á íbúa í formi þess að taka af þeim hærri gjöld að þá höfum við gefið þau fyrirheit að skattar yrðu ekki hækkaðir, segir Hanna Birna. „Auk þess sem við teljum að íbúar og fyrirtæki í borginni hafi nægar byrðar að bera þó borgarstjórn bæti skattahækkunum ekki við," segir Hanna Birna.

Fulltrúar minnihlutans gagnrýndu þessar áætlanir meirihluta borgarstjórnar í dag. Hanna Birna segir að þrátt fyrir þessa andstöðu þeirra við það að hækka ekki skatta hafi samstarfið um alla meginþætti áætlunarinnar gengið afar vel og skilað góðum árangri. Hanna Birna segir að þetta sjónarmið minnihlutans komi ekkert á óvart og ráðist einfaldlega af ólíkri sýn fulltrúa í borgarstjórn á það hvaða aðferðum best sé að beita við gerð fjárhagsáætlana. „Þau eru samkvæm sinni pólitísku sannfæringu þegar þau leggja til að skattar verði hækkaðir við þessar aðstæður," segir Hanna Birna.

Hanna Birna segir að í gegnum þá miklu vinnu sem unnin hafi verið á undanförnum mánuðum við fjárlagafrumvarpið hafi náðst fram hagræðing upp á rúma sex milljarða. Borgarstjórn hafi verið að skoða stjórnkerfið, hvort spara mætti í innkaupum og hvort hægt væri að bíða með einhver verkefni. Auk þess komi til lækkun á launum æðstu embættismanna borgarinnar og endurskoðun á yfirvinnu. „Ég held að frumvarpið sýni að það er vel að hægt að ná fram umtalsverðri hagræðingu án þess að skerða grunnþjónustu við íbúa ," segir Hanna Birna.

Loks segir Hanna Birna að verið sé að skoða framtíðarplön varðandi tónlistar- og ráðstefnuhúsið við höfnina en ákvarðanir verði teknar öðru hvoru megin við áramótin.