Tainio semur við Sunderland

Finnski landsliðsmaðurinn Teemu Tainio sem leikið hefur með Tottenham í ensku úrvalsdeildinni frá árinu 2005 skrifaði í kvöld undir þriggja ára samning við Sunderland.

Tainio er fjölhæfur baráttujaxl sem leikur á miðjunni og fagnaði Roy Keane því að fá þennan reynda leikmann í sínar raðir.

"Það er fyrst og fremst fjölhæfni hans og reynsla sem mun nýtast okkur, því hann getur ekki aðeins spilað margar stöður á vellinum, heldur er hann maður með yfir 40 landsleiki að baki," sagði Keane.

Bakvörðurinn Pascal Chimbonda hjá Tottenham fór í læknisskoðun hjá Sunderland í kvöld og er hann einnig við það að semja við Sunderland.

Þá mun félagið einnig vera í viðræðum við þá Steed Malbranque og Younes Kaboul hjá Lundúnafélaginu - en þar virðist vera útsala í gangi þessa dagana.