Raddir um að Johnson sé á förum háværari

Andrew Johnson var ekki í leikmannahópi Everton sem lék æfingaleik gegn Preston í gær. Þykir þetta renna stoðum undir þær sögusagnir að hann sé á leið til Fulham.

Wigan og Sunderland eru einnig á eftir Johnson en Fulham er talið leiða kapphlaupið um þennan 26 ára sóknarmann.

David Moyes, stjóri Everton, hefur enn ekki keypt neinn leikmann í sumar þrátt fyrir að hafa sagt að liðið þurfi að bæta við sig. Everton hefur verið orðað við Joao Moutinho hjá Sporting Lissabon, Darren Bent hjá Tottenham og Diego Milito hjá Real Zaragoza.

Johnson hefur skorað 22 mörk í öllum mótum síðan hann kom frá Crystal Palace 2006. Hann skrifaði undir fimm ára samning við Everton í nóvember á síðasta ári.

Everton vann æfingaleikinn gegn Preston 1-0.