Jörð heldur áfram að titra við Grímsey

Enn einn skjálftinn varð austnorðaustur af Grímsey rétt fyrir klukkan 21 í kvöld, nú af stærðinni 4,8 á Richter. Fyrr í kvöld varð annar skjálfti á svæðinu sem mældist 4,7 á Richter.

Halldór Geirsson, jarðeðlisfræðingur hjá Veðurstofunni, segir að skjálftahrinur sem þessar séu langt frá því óalgengar á þessu svæði. Hann treysti sér þó ekki til að fullyrða um hvort von væri á stærri skjálftum. ,,Skjálftarnir virðast samt frekar í rénum en annað."

Að sögn Halldórs eru engin merki um að skjálftarnir séu upphafið að neðansjávargosi. ,,Það gæti þó komið upp kvika en það er ekki líklegt," útskýrir Halldór.