Síðasti þáttur Sopranos sýndur í Bandaríkjunum

,,Hvað kemur fyrir Tony" var spurningin sem brann á áhorfendum þegar síðasti þáttur sjónvarpsþáttaseríunnar vinsælu var sýndur í Bandaríkjunum á sunnudagskvöldið.

Eftir átta ár, 86 þætti, og ótal barsmíðar og morð hefur mafíuforinginn og sósíópatinn Tony Soprano öðlast sérstakan sess í hjörtum áhorfenda. ,,Persónan hefur dýpt sem er sjaldséð í mafíuforingjum, svo okkur langar að vita hvað kemur fyrir hann, alveg eins og okkur langar að vita hvað kemur fyrir Ralph frænda." sagði handritshöfundurinn Paul Chicklet við BBC.

Sopranos, sem fjallar um hversdagsleg vandamál Mafíufjölskyldu í New Jersey, hefur verið einn vinsælasti þátturinn í bandarísku sjónvarpi síðan árið 1999. Hann þykir eitt mesta afrek sjónvarpssögunnar, og verið líkt við bæði grískan harmleik og Shakespear-drama.

Best er að láta sem minnst upp um örlög Tonys, en eitt er víst, að áhorfendur voru misánægðir með endalokin sem David Chase, framleiðandi þáttanna, bauð áhorfendum upp á.