Neyðarfundir í eignaleigufyrirtækjum í gærkvöldi

Neyðarfundir voru haldnir í eignaleigufyrirtækjum í gærkvöldi í kjölfar dóma Hæstaréttar í bílalánsmálunum. Þá voru starfsmenn SP-Fjármögnunar við störf í dag á sjálfan þjóðhátíðardaginn. Forstjóri Fjármálaeftirlitsins segist ætla að funda með fjármögnunarfyrirtækjum á næstunni vegna málsins

Samtök fjármálafyrirtækja boðuðu eignaleigufyrirtækin á fund sinn í gær til að ræða niðurstöðu Hæstaréttar. Þá voru neyðarfundir haldnir og fundað fram á kvöld bæði hjá Lýsingu og SP-Fjármögnun í gær. Hjá SP-Fjármögnun voru menn við störf í dag á sjálfan þjóðhátíðardaginn, til að fara yfir niðurstöðu Hæstaréttar.

Samkvæmt heimildum fréttastofu eru forsvarsmenn SP-Fjármögnunar mjög áhyggjufullir yfir þeirri óvissu sem þeir telja að niðurstaðan feli í sér. Rætt hefur verið um að stjórnvöld komi hugsanlega til með að veita leiðbeiningar um hvernig eigi að reikna þessi lán til baka.

Einn starfsmaður SP Fjármögnunar sagðist gjarnan vilja geta svarað því hver næstu skref yrðu og hvernig lánin yrðu reiknuð en sagði það í lausu lofti á þessari stundu.

Gunnar Þ. Andersen, forstjóri Fjármálaeftirlitsins, sagði í samtali við fréttastofu að Fjármálaeftirlitið hefði sérstaklega undirbúið sig fyrir þessa dómsniðurstöðu. Hann sagði að þetta kæmi til með hafa neikvæð áhrif á eiginfjárstöðu fjármálafyrirtækja og fjármögnunarfyrirtækja. Aðspurður hvort FME kæmi til með að veita leiðsögn um endurreikning lánanna sagði hann það ekki ljóst á þessari stundu. Gunnar sagði að FME myndi koma til með að funda með Samtökum fjármálafyrirtækja og forsvarsmönnum fjármögnunarfyrirtækja á næstunni til að ræða þá stöðu sem upp er komin.