Kristbjörg Kjeld borgarlistamaður Reykjavíkur

Kristbjörg Kjeld leikkona er borgarlistamaður Reykjavíkur árið 2010. Það var Jón Gnarr, borgarstjóri, sem sæmdi Kristbjörgu þeim heiðri í Höfða nú klukkan tvö. Kristbjörg fékk í gærkvöldi Grímuna fyrir leik í aukahlutverki fyrir hlutverk sitt í leiksýningunni Hænuungarnir sem var sett á svið hjá Þjóðleikhúsinu.

Við þetta tækifæri var Kristbjörgu veittur ágrafinn steinn, heiðursskjal og viðurkenningarfé. Útnefning borgarlistamanns er heiðursviðurkenning til handa reykvískum listamanni sem með listsköpun sinni hefur skarað fram úr og markað sérstök spor í íslensku listalífi.

Í vor gerðist það í fyrsta sinn að menningar- og ferðamálaráð óskaði eftir ábendingum almennings um borgarlistamann Reykjavíkur og hlaut Kristbjörg fjölda tilnefninga. Kristbjörg hefur búið og starfað í Reykjavík mest allan sinn starfsferil og sannarlega skarað fram úr og markað sérstök spor í íslensku listalífi. Því samþykkti menningar- og ferðamálaráð að Kristbjörg Kjeld yrði útnefnd Borgarlistamaður Reykjavíkur 2010.



Viðurkenningin hefur tíðkast frá árinu 1995.