Mótmæla harðlega samstarfi við Norðurlöndin um aukna hernaðarvæðingu

Samtök hernaðarandstæðinga mótmæla harðlega að Ísland hafi ákveðið að ganga til samstarfs við Norðurlöndin um aukna hernaðarvæðingu, með fjölgun heræfinga og  meiri samvinnu á sviði iðnaðarframleiðslu.

Þetta kemur fram í ályktun frá stjórn Samtaka hernaðarandstæðinga. Þar segir að Ísland virðist þar með vera að taka þátt í aukinni vígvæðingu án nokkurrar opinberrar umræðu.

„Samtök hernaðarandstæðinga ítreka þá skoðun sína að Ísland eigi að vera friðsamleg þjóð, stuðla að friði í heiminum og að flestar aðferðir séu betur til þess fallnar en hernaður og vígvæðing,“ segir í ályktuninni.

Stækkun NATO og uppsetning eldflaugakerfa í Austur-Evrópu undanfarin ár hafi stuðlað að aukinni spennu og óöryggi í þessum heimshluta.

„Augljóst er að Norðurlöndin ætla að taka fullan þátt í að fylgja eftir þeirri þróun. Samtök hernaðarandstæðinga mótmæla því að Ísland taki þátt í því. Nær væri að beita sér fyrir samkomulagi um vopnahlé og undið sé ofan af útþenslu vestrænnar heimsvaldastefnu á svæðinu.“