Ófundinn ræningi 11-11 ógnaði starfsfólki með hnífi

Verslun 11-11 við Grensásveg var rænd í gærkvöldi í annað sinn á tveimur vikum. Ræninginn ógnaði starfsfólki verslunarinnar með hnífi í bæði skiptin og komst undan á hlaupum.

Lögreglan hefur ekki enn fundið manninn og er málið komið til rannsóknardeildar lögreglunnar á höfuðborgarsvæðinu. Ekki er vitað hversu mikið maðurinn hafði upp úr krafsinu en en eitthvað fé úr kassa búðarinnar komst í hans hendur. Síðast þegar þessi sama verslun var rænd hafði ræninginn nokkur þúsund á brott.

Nóttin var annars róleg hjá lögreglunni á höfuðborgarsvæðinu en eitthvað var um smávægilega pústra í miðbænum.

Litháarnir þrír sem handteknir voru í fyrrinótt eftir árás á fíkniefnalögreglumenn eru enn í haldi lögreglu en þeir voru úrskurðaðir í gæsluvarðhald fram á þriðjudag.