Árás á lögreglumenn samsæri fíkniefnabaróna?

Björn Bjarnason spyr á heimasíðu sinni hvort fíkniefnabarónum hafi vaxið viðurkenning fíkniefnadeildarinnar í augum og þess vegna gert erlenda málaliða sína út af örkinn gegn lögreglumönnunum.

Þar er Björn að tala um árásina aðfararnótt föstudags þegar ráðist var á óeinkennisklædda starfsmenn fíkniefnadeildarinnar í miðbænum. Árásarmennirnir tengdust ekki því máli.

„Um áramótin voru félagar í fíkniefnadeildum lögreglu og tollgæslu heiðraðir af Stöð 2 fyrir vel unnin störf á árinu 2007. Þau verðlaun eru verðskulduð. Fíkniefnabarónum hefur kannski vaxið þessi viðurkenning í augum og þess vegna gert erlenda málaliða sína út af örkinni gegn lögreglumönnunum?," spyr Björn á síðunni.

„Áfram verður að leita leiða til að auka öryggi lögreglumanna Þetta síðasta atvik sannar enn, að þeir þurfa að vera við öllu búnir. Huga ber að þjálfun varðhunda fyrir lögregluna og sjá til þess, að hún hafi varnarbúnað með hæfilegan fælingarmátt," segir hann ennfremur.