Fyrrum sveitarstjóri dæmdur í 18 mánaða fangelsi

Brynjólfur Árnason fyrrverandi sveitarstjóri í Grímseyjarhreppi var í dag dæmdur í 18 mánaða fangelsi fyrir umboðssvik og fjárdrátt. Héraðsdómur Norðurlands eystra dæmdi hann einnig til að greiða Grímseyjarhreppi 13,7 milljónir króna í bætur auk 460 þúsund króna í sakarkostnað.

Grímseyjarhreppur fór fram á að Brynjólfur greiddi sér tæpar 27 milljónir króna vegna fjárdráttar í opinberu starfi.

Sveitarstjórinn fyrrverandi var ákærður fyrir fjárdrátt í opinberu starfi á árunum 2005 til 2007. Grunur vaknaði um brot hans þegar hann var dæmdur í héraðsdómi í nóvember í fyrra fyrir að hafa stolið nærri 13 þúsund lítrum af olíu til húshitunar. Fyrir það hlaut hann þriggja mánaða skilorðsbundið fangelsi. Fljótlega eftir það var farið að skoða bókhald Grímseyjarhrepps og þá vaknaði grunur um stórfelld fjársvik Brynjólfs. Honum var sagt upp störfum sem sveitarstjóra og málið í framhaldi kært til lögreglu.