Borgarfulltrúar VG kalla oftast inn varamenn

Borgarfulltrúar Vinstri grænna hafa oftast kallað inn varamenn fyrir sig á fundi borgarstjórnar Reykjavíkur það sem af er ári ef miðað er við fjölda þeirra í borgarstjórn.

Borgarfulltrúar geta kallað inn varamenn eigi þeir ekki kost á að mæta þegar fundur í borgarstjórn hefst eða á meðan á fundi stendur.

Svandís Svavarsdóttir og Þorleifur Gunnlaugsson, borgarfulltrúar VG, hafa 21 sinni kallað inn varamenn til að koma inn í sinn stað.

Borgarfulltrúar Sjálfstæðisflokksins eru sjö og hafa þeir samanlegt 44 sinnum fengið varamenn í sinn stað. 25 sinnum hafa fjórir borgarfulltrúar Samfylkingarinnar kallað inn varamenn.

Haldnir hafa verið 19 fundir í borgarstjórn þetta árið.

Laun borgarfulltrúa skerðast ekki

Grunnlaun borgarfullrúa eru 80% af þingfararkaupi eða 449.616 krónur á mánuði. Í þeim felast að fullu greiðslur fyrir setur í nefndum og ráðum borgarinnar. Laun borgarfulltrúa skerðast ekki forfallist þeir eða mæti aðeins á hluta af tilteknum borgarstjórnarfundi.

1. varaborgarfulltrúar á föstum launum

Fyrstu varaborgarfulltrúar eru allir á föstum launum. Grunnlaun þeirra eru 70% af grunnlaunum borgarfulltrúa eða 314.731 krónur. Varaborgarfulltrúarnir fá launin greidd óháð því hvort þeir komi inn á einn eða fleiri borgarstjórnarfundi.

Varaborgarfulltrúarnir eru; Sif Sigfúsdóttir fyrir Sjálfstæðisflokk, Dofri Hermannsson Samfylkingu, Sóley Tómasdóttir fyrir Vinstri græna, Marsibil Sæmundardóttir Framsóknarflokki og Margrét Sverrisdóttir fyrir F-lista.

Aðrir varamenn fá greiddar 22.481 krónur fyrir setu á fundum í borgarstjórn og gildir einu hvort viðkomandi sitji allan fundinn eða hluta af honum.

Marta hefur mætt oftar en Sif

Marta Guðjónsdóttir, þriðji varaborgarfulltrúi Sjálfstæðisflokksins, hefur komið inn sem varamaður á 16 af 19 borgarstjórnarfundum. Sif hefur fimm sinnum verið kölluð inn.

Næst á eftir Mörtu kemur Sóley sem mætt hefur á 14 fundi. Því næst kemur Dofri sem hefur tíu sinnum á árinu verið kallaður inn. Á eftir honum koma Hermann Valsson, annar varaborgarfulltrúi VG, og Ragnar Sær Ragnarsson, fjórði varaborgarfulltrúi Sjálfstæðisflokksins, sem mætt hafa á sjö fundi.