Fárviðri gekk yfir Grundarfjörð í nótt

Björgunarsveitarmenn voru kallaðir út í Grundarfirði í nótt þegar fárviðri gekk yfir bæinn og vindhraðinn fór þrisvar í 42 metra á sekúndu.

Fyrir utan þessar þrjár kviður blés vindurinn nokkuð jafnt og þétt af 30 metra á sekúndu vindhraða sem eru ellefu vindstig samkvæmt gömlu mælingunni og kallast ofsaveður.

Þakklæðning fór að losna af þaki húss og þakkantar af öðrum húsum þannig að björgunarmenn voru kallaðir út til að hemja frekara fok. Tókst þeim það þrátt fyrir erfið og hættuleg skilyrði.

Þá brotnuðu flaggstangir sem stóðu af sér ofsaveðrið í Grundarfirði fyrir skömmu og eitthvað lauslegt hreyfðist úr stað án þess að valda tjóni svo nokkru næmi.

Síðasta ofsakviðan reið yfir um sjöleytið í morgun en nú er tekið að lægja. Ekki er vitað um tjón annars staðar á norðanverðu Snæfellsnesinu þótt víða hafi verið mjög hvasst á þeim slóðum.