Offitufaraldur þjóðarinnar kostar tvo milljarða á ári

Offitufaraldur geisar á Íslandi og er þróunin einna verst hjá börnum og

unglingum. Tinna Laufey Ásgeirsdóttir, umsjónarmaður meistaranáms í heilsuhagfræði við Háskóla Íslands, segir að þetta geti leitt til þess að útgjöld heilbrigðiskerfisins aukist um hátt í tvo milljarða króna á ári

miðað við að meðalþyngd Íslendinga aukist um eitt stig líkamsþyngdarstuðulsins BMI.

Tinna Laufey telur að þyngdaraukningin hafi verið mjög hröð síðasta einn og hálfan áratug og hröðust sé hún hjá börnum. „Ef maður yfirfærir erlendar niðurstöður má leiða að því líkur að heilbrigðis- og lyfjakostnaður

nemi hátt í tveimur milljörðum króna á ári. Ef við þyngjumst um tvö stig verður viðbótarkostnaðurinn nærri þremur eða fjórum milljörðum."

Tinna Laufey hefur unnið hagfræðilega greiningu á holdafari Íslendinga og bendir í nýrri bók sinni, Holdafar, á að tækniþróun undanfarinna áratuga, til dæmis í matvælaiðnaði, hafi leitt til þess að framboð á fæðu

hafi aukist, verðið lækkað og aðgengið að ódýrri skyndimatvöru vaxið verulega.

Tímasparnaður og verðlækkun komi fram í ofþyngd því að dagleg störf krefjist minni hreyfingar en áður. Þetta komi sér sérstaklega illa fyrir börn og fólk sem eigi við sjálfstjórnarvanda að stríða.

„Neyslumynstur nútímamannsins hefur fetað slóð sem verður að teljast varasöm út frá heilsufarslegum sjónarmiðum."

Hún telur að inngrip geti verið mjög vandasöm. Þess vegna sé mikilvægt að velja úrræði sem mestum árangri skili miðað við fórnarkostnað. Ef gripið verði inn í leggi hún meðal annars til að börnum og unglingum verði auðveldað aðgengi að hollum mat og aðstöðu til hreyfingar á skólatíma. Þá verði takmarkanir settar á markaðssetningu hitaeiningaríkrar fæðu. Ákveðnar matvörur, til dæmis gosdrykkir sem innihalda viðbættan sykur, verði skattlagðar í samræmi við almenna skattheimtu í landinu.