Innlent

Mátti grafa í sundur veg

Héraðsdómur Suðurlands sýknaði dag karlmann af ákæru um eignaspjöll og brot á vegalögum með því að fela verktaka að grafa í sundur veg í sumarbústaðalandi í Grímsnes- og Grafninshreppi.

Maðurinn var ákærður fyrir að hafa látið verktakann grafa sundur svokallaðan Rimamóaveg á landspildu milli Þórisstaða og Reykjaness í Grímsnes- og Grafningshreppi. Með þessu komst eigandi annarrar landspildu ekki að landi sínu.

Fram kemur í dómnum að verktakinn hafi verið að vinna við veginn að ósk félags sumarbústaðaeigenda í Þórisstaðalandi. Vegurinn hafi verið grafinn í sundur til þess að setja hlið á hann en ekki til þess að skemma hann. Bent er á að ekki sé ágreiningur um að Rimamóavegur sé einkavegur í skilningi vegalaga og að viðhald vegarins sé á hendi sumarbústaðaeigenda við Rimamóaveg.

Þá er bent á að maðurinn sem kvartaði yfir því að hafa ekki komist að landspildu sinni sé ekki aðili að félaginu og þá nái lóð hans ekki inn á það svæði sem Rimamóavegur liggi. Því hefðu framkvæmdirnar ekki farið fram innan landareignar hans.

Komst dómurinn að því að hinn ákærði hefði verið að vinna að framkvæmdum við einkaveg í umboði félags sumarbústaðaeigenda og það bryti ekki gegn lögum. Var maðurinn því sýknaður í málinu.

Mest lesið


Fleiri fréttir

Sjá meira


×

Mest lesið