Kristján Þór neitar að hafa lofað Hagkaupum verslun á Akureyrarvelli

Fyrrverandi bæjarstjóri á Akureyri neitar að hann hafi verið búinn að gera samkomulag um Hagkaupsverslun þar sem Akureyrarvöllur stendur nú eins og áhöld hafa verið uppi um.

Föst skeyti hafa gengið milli Jóhannesar Jónssonar sem jafnan er kenndur við Bónus og Sigrúnar Bjarkar Jakobsdóttur bæjarstjóra vegna skipulagsmála á Akureyri. Sigrún Björk hefur opinberlega sagst mótfallin því að Hagkaupsverslun myndi rísa á svæðinu og talið það óhugsandi. Jóhannes í Bónus brást illa við yfirlýsingu hennar í Morgunblaðinu á dögunum og sagðist hafa verið dreginn á asnaeyrunum.

Jóhannes vísaði til þess að fyrrverandi bæjarstjóri Kristján Þór Júlíusson sem nú gegnir þingmennsku fyrir Sjálfstæðisflokkinn, hefði áður gefið sér ádrátt um að þarna myndi rísa Hagkaupsbúð. En þar stendur orð gegn orði. Í bæjarsjónvarpinu á Akureyri var Kristján Þór spurður um helgina út í hvort hann kannaðist við að hafa gert slíkt samkomulag við Jóhannes og sagðist hann ekki kannast við það.

Sumir líkt og Oddur Helgi Halldórsson bæjarfulltrúi L-listans hafa sagt að Sigrún Björk hafi verið of fljót á sér í yfirlýsingum um svæðið. Sjálf hefur Sigrún Björk talað fyrir lágreistri íbúabyggð þar sem völlurinn stendur nú, en Kristján Þór er ósammála henni um að það sé besti kosturinn.