Læknar, dómarar og flugumferðarstjórar launahæstir

Læknar, dómarar og flugumferðarstjórar eru launahæstu stéttir hjá hinu opinbera, samkvæmt tölum kjararannsóknarnefndar opinberra starfsmanna. Leikarar og starfsmenn Sinfóníuhljómsveitarinnar eru hins vegar í hópi þeirra sem bera minnst úr býtum.

Læknar eru tekjuhæsta stétt opinberra starfsmanna þegar horft er til heildarlauna en ef eingöngu er tekið mið af dagvinnulaunum færast dómarar í efsta sætið. Flugumferðarstjórar eru svo í þriðja sæti en rétt er að taka fram að æðstu embættismenn, eins og ráðherrar, eru ekki með í þessum tölum. Heildarmánaðarlaun upp á nærri 900 þúsund krónur sætja læknana í efsta sætið en dagvinnulaun þeirra fyrstu sex mánuði ársins voru hins vegar 475 þúsund að meðaltali.

Dómarar höfðu að meðaltali um 840 þúsund krónur í heildarlaun á mánuði en um 580 í dagvinnulaun. Flugumferðarstjórar voru með um 780 þúsund í heildarlaun en um 440 fyrir dagvinnuna. Athygli vekur að þessar þrjár stéttir skera sig verulega úr en þar á eftir koma prófessorar, prestar og verkfræðingar, með heildarlaun á bilinu 500 til 550 þúsund á mánuði. En þá er að sjá listann yfir launalægstu stéttir hins opinbera.

Það eru félagsráðgjafar, leikskólakennarar, grunnskólakennarar, leikarar, almennir starfsmenn stjórnarráðs, starfsmenn sinfóníunnar og á botninum sitja þeir sem eru í starfsmannafélagi ríkisstofnana, en það eru almennir starfsmenn hjá stofnunum og fyrirtækjum ríkisins. Heildarlaun þeirra eru um 280 þúsund á mánuði að jafnaði en dagvinnulaun um 205 þúsund að jafnaði.

Starfsmenn Sinfóníunnar eru með næstlægstu heildarlaunin en færu upp fyrir grunnskólakennara ef aðeins væri horft á dagvinnulaun. Að lokum skulum við sjá laun nokkurra fjölmennra hópa. Lögfræðingar, viðskipta- og hagfræðingar, hjúkrunarfræðingar og lögreglumenn eru með heildarlaun á bilinu 440 til 470 þúsund á mánuði en bæði hjúkrunarfræðingar og lögreglumenn eru hins vegar með verulega minna fyrir dagvinnuna en hinir.

Framhaldsskólakennarar og náttúrufræðingar eru með í kringum 400 þúsund í heildarlaun en neðst á þessum lista eru sjúkraliðar, með 335 þúsund að jafnaði í heildarlaun en 217 þúsund í dagvinnulaun, en ef eingöngu væri horft til dagvinnu væru sjúkraliðar næstlaunalægsti hópurinn.