Vindurinn feykti bíl aftur upp á hjólin

Ökmaður sendibíls slasaðist á baki þegar bíll hans fauk út af veginum undir Hafnarfjalli um fjögurleytið í nótt. Að sögn lögreglunnar á Selfossi fór bíllinn eina eða tvær veltur út af veginum og lá hann á hliðinni þegar lögreglu bar að garði.

Ökumaðurinn var þá á bak og burt en hann hafði fengið far til Borgarness hjá öðrum ökumanni. Eftir skoðun á heilsugæslunni í Borgarnesi var ákveðið að flytja manninn á sjúkrahúsið á Akranesi þar sem hann dvelur nú.

Lögregla segir að vindstyrkurinn hafi verið um 47 metrar á sekúndu þegar hún vitjaði sendiferðabílsins um hálffimmleytið í nótt. Þá lá hann sem fyrr segir á hliðinni. Þegar lögregla kom aftur á vettvang um áttaleytið í morgun var bíllinn hins vegar á hjólunum og virðist því vindurinn hafa velt bílnum aftur á hjólin.

Veðrið hefur nú gengið töluvert niður og eru nú 25 metrar á sekúndu undir Hafnarfjalli. Tíu flutningabílar sem biðu þess í Borgarnesi í nótt að veður lægði eru farnir þaðan og til Reykjavíkur að sögn lögreglu og ferðaveðrið er því eilítið skárra.