Varað við umferð undir Hafnarfjalli vegna veðurofsa

Lögreglan í Borgarnesi vill vara fólk við að aka undir Hafnarfjall sökum veðurs. Mikill vindur er á svæðinu, allt að 40 metrar á sekúndu, en í nótt fór vindhraðinn á þessum slóðum í yfir 50 metra á sekúndu.

Lögreglan segir að fólk eigi ekki að vera á ferð á þessu svæði að nauðsynjalausu. Og það egi alls ekki að keyra um með aftaníkerru eða á léttum sendibílum.

Nú bíða 10 flutningabílar í Borgarnesi þess að veðrið lægi. Eitt óhapp varð í nótt er bíll valt á hliðina norður af Hafnaránni. Sem dæmi um veðurofsann er vindurinn búinn að velta bílnum aftur upp á hjólin.

Þá er búið að fresta för ferjunnar Herjólfs til Vestmannaeyja nú í morgunsárið en athuga á með fyrstu ferð um kl. 10.