Leyfilegt að vinna peningaverðlaun í bridge en ekki póker

„Þetta er ekkert öðruvísi en pókerinn og er bara gjörsamlega fáránlegt," segir Sindri Lúðvíksson pókeráhugamaður um Bridgehátíð 2008. Sérstakt þáttökugjald er í mótinu og fær sigurvegarinn peningaverðlaun.

Sindri sem er eigandi verslunarinnar Gismo.is hélt pókermót á dögunum sem var stöðvað af lögreglu og er málið enn í rannsókn. Hann segist ekki sjá muninn á fyrirkomulaginu á Bridgemótinu og Pókermótinu sem hann hélt á dögunum.

Friðrik Smári Björgvinsson yfirlögregluþjónn hjá lögreglunni á höfuðborgarsvæðinu segir að póker sé flokkað sem fjárhættuspil þar sem spilað er upp á peninga í hverju spili. „En bridgemót með þessu sniði er bara svipað og golfmót með peningaverðlaunum," segir Friðrik Smári.

„Þetta er nú bara eins og að bera saman epli og appelsínur. Í póker ertu alltaf að spila upp á spilapeninga og tapar aldrei meiru en bara aðgönguféinu. Það þarf heppni í bridge og líka í póker," segir Sindri ósáttur með bannið á pókermótunum.

Eftir upplýsingum frá Bridgesambandinu hafa 135 pör skráð sig til leiks um helgina. Þáttökugjaldið er 30 þúsund á par og má því gera ráð fyrir að verðlaunaféið sé í kringum fjórar milljónir króna.

Sindri segir engan mun vera á þáttökugjaldi í bridgemóti og þegar menn kaupa sér spilapeninga til þess að taka þátt í póker. „Þeim finnst bara vera einhver Vegasfílingur yfir pókernum eða eitthvað."

Sindri hefur þó trú á því að pókermót verði leyfð hér á landi fljótlega. „Þetta er bara eins og með bjórinn og hnefaleikana sem var bannað áður en lifir góðu lífi núna. Þessi lög eru bara barn síns tíma."