Óljóst og loðið hjá kirkjunni

Samþykkt kirkjuþings í morgun um að leyfa prestum að staðfesta samvist samkynhneigðra er loðin og óljós að mati formanns Samtakanna 78. Hann sakar forystu þjóðkirkjunnar um að vilja viðhalda aðskilnaðarstefnu gagnvart samkynhneigðum.

„Það er óljóst hvað felst í þessari samþykkt," sagði Frosti Jónsson, formaður Samtakanna 78, í samtali við Vísi. „Það má lesa út úr þessu að prestar fái heimild til að staðfesta samvist ef lögunum verður breytt. Hins vegar er ekki tekin afstaða til þess hvort í þessu felst vígsla eða blessun."

Kirkjuþing samþykkti í morgun tillögur Karls Sigurbjörnssonar, biskups Íslands, um að prestar fái heimild til að staðfesta samvist samkynhneigðra. Í tillögu biskups er þó skýrt tekið fram að þjóðkirkjan ætli sér ekki að breyta afstöðu sinni til hjónbandsins sem eingöngu sáttmáli milli karls og konu.

Frosti segir tillögu biskups fyrst og fremst endurspegla þann vilja forystu þjóðkirkjunnar um að samkynhneigðum verði áfram haldið fyrir utan þá stofnun sem hjónabandið er. „Forysta kirkjunnar vill ríghalda í það sem þeir vilja meina að sé hinn hefðbundinn skilningur á hjónabandi og festa þann skilning í sessi. Í þessari tillögu er hins vegar ekki tekinn afstaða til þess hvort stíga eigi það skref til fulls að leyfa prestum að vígja hjónaband samkynhneigðra. Því kemur fátt á óvart í þessu."

Yfirlýsingu frá Samtökunum 78 má sjá hér að neðan: