Krefst viðurkenningar bótaskyldu

Tekið var fyrir í Héraðsdómi Reykjavíkur í gær mál séra Sigríðar Guðmarsdóttur gegn Biskupsstofu. Farið var fram á að bótaskylda væri viðurkennd vegna þess að Biskupsstofa hefði gengið framhjá Sigríði þegar ráðið var í stöðu sendiráðsprests í London. Áður hefur Sigríður stefnt biskupi Íslands fyrir hönd þjóðkirkjunnar og krafist hálfrar milljónar í miskabætur. Sif Konráðsdóttir, lögmaður Sigríðar, segir að ekki sé búið að reikna út það fjártjón sem Sigríður hafi orðið fyrir vegna þessa. Það verði ekki gert fyrr en búið sé að úrskurða um bótaskyldu Biskupsstofu í málinu. Séra Sigurður Arnarsson, tengdasonur biskups Íslands, hreppti embættið í London sem séra Sigríður sótti um. Hún heldur því fram að málefnaleg sjónarmið hafi ekki ráðið við mat á hæfni umsækjenda og menntun sín og starfsreynsla hafi verið meiri en þess er embættið hlaut. Sigríður hefur lokið M.Phil-gráðu, sem er þriggja ára nám, auk embættisprófs, en Sigurður hefur lokið einu ári í sjúkrahúsprestsnámi auk embættisprófs.