Brunavörnum í MR verulega ábótavant

Gríðarlega mikil menningarverðmæti gætu glatast ef eldur kæmi upp í húsi Menntaskólans í Reykjavík. Byggingafulltrúi Reykjavíkurborgar segir brunavörnum í húsinu verulega ábótavant og að fara verði strax í aðgerðir til að bæta þar úr.

Hús Menntaskólans í Reykavík státar af langri og merkilegri sögu. Húsið var reist um miðja nítjándu öld og þar var meðal annars þjóðfundurinn haldinn árið 1851.

Stórbruninn í Lækjargötu á síðasta ári þar sem tvö gömul hús brunnu nánast til kaldra kola hefur vakið upp spurningar um brunavarnir í gömlum húsum. Á fundi slökkviliðsstjóra á Grand Hótel í gær kom meðal annars fram að mörg gömul hús í miðbæ Reykjavíkur eru með úreltar eða alls engar brunavarnir.

Magnús Sædal, byggingarfulltrúi í Reykjavík, segir að fjöldi merkilegra timburhúsa sé í borginni og þar gnæfi upp úr Menntaskólinn sem sé eiðsvöllur borgarinnar „og þar verður að fara í það að setja vatnsúðunarkerfi. Það er ekki spurning um að gera það. Þar eiga menn ekki að bíða eftir því að fara í endurbyggingu, menn eiga að gera þessar ráðstafanir strax," segir Magnús.

Aðspurður hvort húsið sé í hættu ef það kæmi upp eldur nú segir Magnús að það gæti orðið svakalegt „því þetta hús er allt saman fullt af holrýmum og menn gætu lent í gríðarlegum vanda að slökkva í því húsi," segir Magnús.

Undir þetta tekur Björn Karlsson brunamálastjóri en hann vinnur nú í samvinnu við borgaryfirvöld að heildarúttekt á brunavörnum í gömlum byggingum. „Ég held t.d. að hús eins og Menntaskólinn í Reykjavík sem er ómetanlegt hús hvað varðar menningarverðmæti það verður að fara að skoða svona hús," segi Björn og nefnir einnig Iðnó og önnur hús sem þjóðin vilji ekki missa.