Þingmenn vilja Þríhjúkahelli aðgengilegan almenningi

Hópur alþingismanna hefur lagt fram þingsályktunartillögu þar sem skorað er á menntamálaráðherra að hefja strax vinnu til þess að fylgja eftir hugmyndum um að gera Þríhnjúkahelli í Bláfjöllum, stærsta hraunhelli í heimi, aðgengilegan fyrir ferðamenn.

Í greingargerð með frumvarpinu er bent á að Árni B. Stefánsson augnlæknir og hellakönnuður hafi fyrstur manna sigið niður á botn gígsins árið 1974.  „Hellirinn er einstakur að gerð, tröllaukið gímald, um 175 m á dýpt og á við fótboltavöll að flatarmáli í botni, stærsta þekkta hraunhvelfing í heimi og eitt merkasta náttúruundur á Íslandi, falinn neðanjarðar við bæjardyr höfuðborgarinnar í landi Kópavogs. Þríhnjúkahellir er einstakt náttúruundur á heimsmælikvarða en víða um heim er gert út á heimsóknir í sérstæða hella og þeir skipta miklu máli í ferðaþjónustu og landkynningu," segir enn fremur í greinargerð með tillögunni.

Bent er á að stóru íbúðablokkirnar þrjár efst á Laugarásnum, sem eru tólf hæðir, myndu rúmast hlið við hlið í gígnum og og ef Hallgrímskirkja væri síðan sett ofan á tólf hæða blokkirnar mundi vanta 15 metra upp á að krossinn á kirkjunni stæði upp úr gígopinu.

Verkefni upp á milljarð króna

Bent er á að félag undir forystu Árna B. Stefánssonar, Þríhnjúkar ehf., hafi hafið undirbúning að því að gera Þríhnjúkahelli aðgengilegan. Upplýsinga um næstu skref sé að vænta á komandi hausti, en þær hugmyndir sem nú er unnið að byggjast á því að gera 200 metra löng göng inn í Þríhnjúkahellinn sem mundu opnast inn í hellishvelfinguna á 64 metra dýpi að stórum svölum og síðan yrði jafnvel hringstigi niður á botn hellisins.

Þríhnjúkar ehf. hafa gert samning við Kópavogsbæ um framgang verkefnisins þar sem hellirinn er í landi bæjarins. Verkefnið er firnamikið og reikna má með að það kosti um milljarð króna að gera göng, svalir, hringstiga, lýsingu og annað sem þarf til þess að fulls metnaðar sé gætt. „Aðgengi að Þríhnjúkahelli er einn af mörgum möguleikum í markaðssetningu Íslands á alþjóðavettvangi, enn ein fjólan í íslenska náttúruvöndinn," segir í greinargerðinni.

Bent er á að á Íslandi sé enginn aðgengilegur sýningarhellir með göngustígum og raflýsingu. Tveir fegurstu hellar landsins, Jörundur og Árnahellir, hafi verið friðlýstir sérstaklega og lokaðir fyrir nánast allri umferð.