Gleypti 300 g af kókaíni

Nígeríska konan sem reyndi að smygla tæplega hálfu kílói af kókaíni til landsins í síðustu viku gleypti tuttugu og sjö pakka með efninu. Um sjötíu prósent af efninu voru innvortis, eða rúmlega 300 grömm, sem er það mesta sem þekkist hér á landi. Hver pakkanna innihélt um 10-12 grömm af kókaíni. Eyjólfur Kristjánsson, fulltrúi hjá sýslumanninum í Keflavík, segir þetta það mesta sem fundist hafi innvortis hjá því sem hann nefnir „gleypara“. Konan er um þrítugt og var stöðvuð við komuna til landsins frá Danmörku aðfaranótt fimmtudagsins síðasta og hefur allt efnið sem hún var með innvortis skilað sér. Konan var einnig með rúm 150 grömm innanklæða. Eyjólfur segir rannsóknina unna í samvinnu við tollayfirvöld annars staðar á Norðurlöndum þar sem algengt er að ungar afrískar konur séu notaðar sem burðardýr. Erfitt geti verið að rannsaka tengsl við fólk hér á landi þar sem stúlkunum séu gefnar litlar upplýsingar.