Stjórnlaust teiti í Þingholtunum og vinir í áflogum

Dagurinn og nóttin voru nokkuð erilsöm að sögn lögreglunnar á höfuðborgarsvæðinu. Tilkynnt var um nokkur eignaspjöll, til að mynda var bifreið skemmd  og rúða brotin á skemmtistað.

Tilkynnt var um teiti sem var að fara úr böndunum í Þingholtunum og slógust nokkrir þar og í átökunum skemmdist bifreið á vettvangi.

Höfð voru afskipti af tveim mönnum að slást í miðbænum, eftir á kom í ljós að þeir voru vinir. Annar þeirra var þó svo æstur og illa staddur sökum ölvunar eða annarra vímuefna að hann endaði á því að vera handtekinn og vistaður. Hann var ekki viðræðuhæfur, neitaði að gefa upp hver hann var og í ljós kom að hann hafði farið út að skemmta sér með vasahníf meðferðis. „Áréttað skal að vopnaburður er óheimill á almannafæri en að gefnu tilefni er almennt ekki skynsamlegt að nota vímuefni og vera vopnaður,“ segir í tilkynningu frá lögreglunni.

Tilkynnt var um nokkuð óhöpp sem flest voru þó minniháttar og tengdust neyslu áfengis eða annarra vímugjafa. Tvær konur fengu minniháttar skrámur í miðbænum en slysin tengdust ölvunarástandi þeirra. Lögregla fór einnig á vettvang þar sem maður fótbrotnaði í fótboltaleik en um slys var að ræða.

Þá voru þrír drengir gripnir á stolinni vespu, þeir voru 14, 16 og 17 ára. Einhverjir fleiri höfðu tengst málinu og vinnur lögregla í því að hafa upp á þeim. Haft var samband við forráðamenn og tilkynning send til barnaverndar vegna málsins.

Tilkynnt var um 3 sem óku undir áhrifum áfengis en þar af var einn líka undir áhrifum fíkniefna og var sviptur ökuréttindum.