Hegðun Isavia starfsmannsins telst ekki kynferðisleg áreitni

Isavia, sem rekur flugvelli á Íslandi, var í Hæstarétti í dag sýknað af kröfu konu sem vann hjá fyrirtækinu vegna vangoldinna launa auk miskabóta vegna kynferðislegrar áreitni sem hún kvaðst hafa orðið fyrir af hálfu yfirmanns síns. Konan byggði kröfu sína á því að viðbrögð fyrirtækisins hefðu ekki verið í samræmi við alvarleika málsins og breytingar hafi verið gerðar á starfi hennar svo að henni hafi verið gert ókleift að sinna því.

Hæstiréttur hafnaði því að hegðun yfirmannsins gæti fallið undir skilgreiningu hugtaksins kynferðisleg áreitni samkvæmt lögum um jafna stöðu og jafnan rétt kvenna og karla. Hegðun mannsins mun hafa falist í því að fara nakinn í heitan pott í sumarbústað í vinnuferð sem þau fóru saman ásamt þriðja aðila. Þá taldi rétturinn með engu móti hafa verið sýnt fram á að konan hafi verið beitt óréttlæti í starfi með tilliti til starfsöryggis og starfskjara.

Konan hefði ekki sýnt fram á að hún ætti rétt til greiðslu launa fyrir það tímabil sem hún kaus að mæta ekki til vinnu eða að framkoma fyrirtækisins í hennar garð hafi á einhvern hátt falið í sér ólögmæta meingerð. Var Isavia því sýknað af kröfum konunnar.

Héraðsdómur Reykjaness hafði dæmt Isavia til að greiða konunni tæpar 1800 þúsund krónur í ógreidd laun og bætur en Hæstiréttur sneri dómnum við.