ÖSE gagnrýnir ójafnt atkvæðavægi milli kjördæma

„Við bjuggumst við óheftum og lýðræðislegum kosningum, og sjálfur hef ég ekkert séð sem ekki stenst þær vonir," segir Geert Heinrich Ahrens, yfirmaður kosningaeftirlits Öryggis- og samvinnustofnunar Evrópu (ÖSE) hérlendis.

Tíu fulltrúar ÖSE fylgdust með framkvæmd alþingiskosninganna um allt land á laugardag. Slíkt eftir­lit er afar smátt í sniðum, að sögn Ahrens.

„Okkar hlutverk var í raun að kanna hvort niðurstöður kosninganna endurspegli raunverulegan vilja þjóðarinnar, og ég get ekki séð að nokkuð hreki það," segir Ahrens.

Ahrens nefnir þó ójafnt atkvæðavægi á milli kjördæma sem eitt af þeim atriðum sem þarf að leysa úr. „Þetta er eitthvað sem Íslendingar hafa unnið að í áratugi og það er stöðug umræða hér um atkvæðajafnvægið," segir hann. „Eðlilegast væri að hver kjósandi myndi vega jafnt við útreikning á þingsætum," segir Ahrens.

Hann tekur þó fram að þetta sé einungis almenn athugasemd. Það sé alfarið í höndum íslenskra stjórnvalda að ákveða hvort breytingar verða gerðar á kerfinu, til dæmis hvort sameina eigi öll kjördæmin í eitt. „Það er einn mikilvægasti réttur hvers sjálfstæðs ríkis að ákveða sjálft hvers konar kosningakerfi er notað." - sh