Man. City getur unnið titil á sama degi og Liverpool mætir Man. United

Pep Guardiola, knattspyrnustjóri Manchester City, spáir því að úrslitin í ensku úrvalsdeildinni ráðist ekki fyrr en í síðustu tveimur umferðum mótsins. City getur jafnað Liverpool að stigum vinni liðið Everton í kvöld.

Liverpool hefur gert jafntefli í tveimur síðustu leikjum sínum á móti Leicester og West Ham sem þýðir að stað þess að vera með sjö stiga forystu þá nær City toppsætinu á markatölu með sigri á Everton á Goodison Park.

Útsending Stöðvar 2 Sport Everton og Manchester City hefst klukkan 19:35 í kvöld.

Tottenham er heldur ekki út úr myndinni því liðið er bara fimm stigum á eftir toppliðunum og á eftir að mæta bæði Liverpool og Manchester City.

Pep Guardiola: Man City boss expects title race to go down to 'last fixture or two' https://t.co/HdkqxHmFSA

— BBC News (UK) (@BBCNews) February 6, 2019

Leikur Everton og Manchester City átti að fara fram 23. febrúar en var fluttur fram vegna þess að þá helgi mætir City liði Chelsea í úrslitaleik enska deildarbikarsins.

Úrslitaleikur City og Chelsea fer fram á Wembley 24. febrúar og á sama degi fer fram risaleikur á Old Traford.

City getur því unnið titil þennan dag sem er líka mjög mikilvægur fyrir Liverpool sem heimsækir þá Manchester United á Old Trafford í gríðarlega veigamiklum leik fyrir Jürgen Klopp og lærisveina hans.

Í tilefni af orðum Pep Guardiola um að úrslitin ráðist í síðustu tveimur umferðunum er ekki úr vegi að skoða aðeins tvær síðustu umferðirnar og leiki toppliðanna í þeim.

Manchester City mætir þar Leicester á heimavelli og sækir síðan Brighton heim í lokaumferðinni.

Liverpool heimsækir Newcastle og tekur síðan á móti Wolves á Anfield í lokaumferðinni.

Tottenham er á útivelli á móti Bournemouth og í lokaumferðinni kemur svo Everton í heimsókn, vonandi á nýja Tottenham-leikvanginn.