Arteta: Væri ekki hér ef ég væri ekki tilbúinn

Mikel Arteta var ráðinn nýr knattspyrnustjóri Arsenal í dag. Hann hélt sinn fyrsta blaðamannafund hjá nýja félaginu nú síðdegis.

Arteta kemur frá Manchester City þar sem hann hefur verið aðstoðarmaður Pep Guardiola síðustu ár. Hann gerði garðinn frægan sem leikmaður fyrir Arsenal.

„Það var alltaf draumur hjá mér að koma aftur hingað. Ég ber svo mikla virðingu fyrir þessu fótboltafélagi,“ sagði Arteta.

Spánverjinn spilaði 149 leiki fyrir Arsenal á árunum 2011-2016 og skoraði hann í þeim 16 mörk.

Þegar hann hætti sem leikmaður 2016 gerðist hann aðstoðarmaður Guardiola hjá City. Þetta er hans fyrsta starf sem aðalþjálfari.

„Ef ég héldi að ég væri ekki tilbúinn þá sæti ég ekki hér.“

„Mér líður eins og ég sé kominn aftur heim. Ég er ótrúlega ánægður og stoltur með tækifærið að fá að stýra þessu fótboltaliði.“

„Síðustu ár er ég búinn að undirbúa mig fyrir þessa áskorun. Ég er tilbúinn í hana og get ekki beðið eftir því að byrja.“

Arsenal hefur ekki gengið vel á tímabilinu og er liðið aðeins í 10. sæti ensku úrvalsdeildarinnar.

„Það fyrsta sem þarf að breyta er orkan innan félagsins.“

„Utan frá þá er eins og félagið hafi misst sjónar á einkennum sínum. Ég vil komast að því afhverju og koma öllum inn á sama hugarfarið.“

Arteta vann náið með Pep Guardiola síðustu ár og það tók á hann að yfirgefa Manchester City.

„Ég átti í ótrúlega góðu sambandi við Pep. Hann er leiður yfir því að ég hafi farið og tímasetningin er ekki sú besta, en hann skildi mig.“

„Kveðjustundin hefði ekki getað farið betur og samband okkar er enn gott. Ég kvaddi leikmennina og grét.“

Arteta fær lítinn tíma til að undirbúa sig fyrir fyrsta leik, en næsti leikur Arsenal er í hádeginu á morgun, gegn Everton í ensku úrvalsdeildinni.