Arteta kvaddi leikmenn City í morgun

Mikel Arteta kvaddi leikmenn Manchester City fyrir æfingu liðsins í morgun.

Reiknað er með að Arteta verði kynntur sem nýr knattspyrnustjóri Arsenal á morgun.

Arteta hefur verið aðstoðarmaður Peps Guardiola hjá City síðan 2016. Hann er í miklum metum hjá félaginu og hefur verið nefndur sem mögulegur eftirmaður Guardiolas.

Arteta lék með Arsenal á árunum 2011-16 og var fyrirliði liðsins um tíma. Spánverjinn varð tvisvar sinnum bikarmeistari með Arsenal.

Næsti leikur Arsenal er gegn Everton í hádeginu á laugardaginn. Bæði lið eru í stjóraleit.