Innlent

Vonsviknir makrílveiðimenn ætla í mál við ríkið

Kristín Ólafsdóttir skrifar
Ásmundur Skeggjason talsmaður Félags makrílveiðimanna.
Ásmundur Skeggjason talsmaður Félags makrílveiðimanna. Vísir/ÞÞ

Fyrirtæki sem standa að Félagi makrílveiðimanna munu höfða skaðabótamál á hendur íslenska ríkinu eftir að frumvarp um kvótasetningu á makríl varð að lögum á Alþingi í dag. Formaður félagsins segir það hafa komið félagsmönnum á óvarp að frumvarpið hafi verið samþykkt óbreytt.

Frumvarpið, sem fjallar um fiskveiðar utan lögsögu Íslands, var samþykkt á Alþingi í dag með 28 greiddum atkvæðum. 18 þingmenn stjórnarandstöðunnar greiddu atkvæði á móti frumvarpinu en það hefur verið afar umdeilt.

Sjá einnig: „Við munum væntanlega bara afhenda ráðherra lyklana að útgerðunum okkar“

Með frumvarpinu falla veiðar á makríl nú undir íslenska fiskveiðistjórnunarkerfið en lítil útgerðarfyrirtæki hafa gagnrýnt frumvarpið harðlega og sagt það færa miklar heimildir frá minnstu og viðkvæmustu útgerðum landsins til stærstu útgerðarfyrirtækjanna.

Kristján Þór Júlíusson, sjávarútvegsráðherra. Vísir/vilhelm

Þannig munu uppsjávarskip í eigu stærri útgerðarfyrirtækja fá 15 prósent meira af úthlutuðum makrílkvóta. Frystiskip missa tíu prósent af sínum kvóta, ísfisktogarar í eigu meðalstórra útgerðarfyrirtækja missa 40 prósent af kvótanum sínum og krókaskip í eigu lítilla útgerða missa 45 prósent.

Eitt það umdeildasta í frumvarpinu eru breytingartillögur meirihluta atvinnuveganefndar sem fela í sér að makrílkvóti skiptist í tvo flokka, A- og B-flokk. Í B-flokki verða línu- og handfærabátar og verður þeim óheimilt að framselja kvótann en öll önnur skip sem eru með makrílkvóta í A-flokki þurfa ekki að þola slíkar skerðingar á heimildum sínum.

Vonsviknir með óvænta niðurstöðu

Ásmundur Skeggjason talsmaður Félags makrílveiðimanna hefur áður gefið út að smábátaeigendur sjái sér ekki annað fært en að fara í mál við ríkið vegna laganna. Hann segir í samtali við Vísi í dag að félagið muni standa við málshöfðunina.

„Við vorum í rauninni bara að fá þessar upplýsingar um að þetta hefði verið samþykkt í óbreyttri mynd og höldum okkar striki bara,“ segir Ásmundur.

„Við teljum að jafnræðis sé ekki gætt við úthlutunina og sjáum því í rauninni engan annan kost en að skera úr um lögmæti fyrir dómstólum.“

Niðurstaðan í dag sé jafnframt mikil vonbrigði – og enn fremur óvænt.

„Þetta kom okkur mjög á óvart að þetta skyldi fara í gegn svona óbreytt. Við trúðum því ekki að þetta yrði samþykkt svona.“

Ásmundur segir að stjórn félagsins muni setjast niður með lögfræðingi sínum eins fljótt og auðið er, sem þó verði líklega ekki fyrr en eftir sumarfrí.


Tengdar fréttir

Bótakröfur á ríkið vegna makrílkvóta

Ríkislögmaður staðfestir að borist hafi stefnur vegna kvótasetningar makríls í upphafi áratugarins en gefur ekki upp fjölda eða bótakröfur. Heimildir herma að stórir aðilar stefni. Kröfur gætu numið allt að 35 milljörðum króna.

„Við munum væntanlega bara afhenda ráðherra lyklana að útgerðunum okkar“

Smábátaútgerðir ætla að höfða skaðabótamál á hendur íslenska ríkinu verði frumvarp um kvótasetningu á makríl að lögum. Málshöfðunin er meðal annars til komin vegna breytinga atvinnuveganefndar Alþingis á frumvarpinu sem fyrirtækin telja að gangi í berhögg við jafnræðisreglu stjórnarskrár.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.